500 sportistë nga 28 universitete të Botës do të garojnë në Kosovë në hendboll

Kosova për herë të parë do të organizojë Kampionatin Botëror Universitar në Hendboll dhe kjo është ngjarja më e madhe sportive e organizuar ndonjëherë në vendin tonë.

Për të dhënë detaje rreth kësaj ngjarje është mbajtur konferencë për media, në të cilën kanë qenë të pranishëm ministri i Sportit, Hajrulla Çeku, rektori i Universitetit të Prishtinës “Hasan Prishtina, Naser Sahiti, kryetari i Komunës së Prishtinës, Përparim Rama, drejtori ekzekutiv i Kupës Botërore Universitare në Hendboll, Musa Selimi, U.D i kryetarit të Federatës së Sporteve Universitare, Gani Ibrahimi, Presidenti i Federatës së Hendbollit të Kosovës, Eugen Saraçini.

Ministri Çeku ka theksuar që Ministria e Sportit po bënë gjithçka për të bërë një dinamikë më strategjike në zhvillimin e sportit, duke e trajtuar si prioritet shtetëror për të konsoliduar standardet e qeverisjes së mirë në organizatat sportive, ndërsa u shpreh i lumtur që një ngjarje e tillë sportive po organizohet në Kosovë.

Kupa Botërore Universitare në Hendboll do të mbahet në periudhën 11-17 korrik 2022, në Pallatin e Rinisë dhe sallën “1 Tetori”.

Prishtina do të jetë kryeqyteti i studentëve të botës, 500 sportistë nga 28 universitete do të garojnë për titullin e më të mirit në botë në hendbollin universitar.