Homazhe për ish boksierin e ndjerë, Xhevdet Peci
Sot në Pallatin e Rinisë dhe Sporteve në Prishtinë, nën organizimin e Ministrisë së Sportit, janë mbajtur homazhe për ish boksierin, Xhevdet Peci.
Në këtë ceremoni lamtumirëse morën pjesë kryetari i Kuvendit të Kosovës, Glauk Konjufca, ministri i Sportit, Hajrulla Çeku, ministri i Bujqësisë, Faton Peci, zëvendësministrja Daulina Osmani, kryetari i Komitetit Olimpik të Kosovës, Ismet Krasniqi, drejtues të federatës së boksit, familjarë, ish boksierë të gjeneratës dhe miq të boksierit të ndjerë.
Kryetari i Kuvendit të Kosovës, Glauk Konjufca në fjalën e tij e vlerësoi lartë figurën e ish boksierit ndërsa u shpreh që ai do të kujtohet dhe nderohet gjithmonë me krenari. Kurse ministri Çeku ndër të tjera tha që sot është një ditë shumë e vështirë për të gjithë pasi Xhevdet Peci ka qenë një prej figurave qendrore të sportit në Kosovë dhe ka dhënë kontribut të jashtëzanonshëm në këtë fushë ndërsa shtoi që veprimtaria e tij do të kujtohet gjithmonë.
Qoftë i përjetshëm kujtimi për të.